වෙනස ට පෙර විරාමයක්

විසිතුරු ගෘහ සැරසිල්ලක්

                                    ‘රළු යන්න අපට එතරම් සොඳුරු අරුතක් ඇති වදනක් නොවන්නේ, තවමත් පවතින පිළිවෙළින්ම ලස්සන, සුන්දරත්වය අරුත් ගන්වන්නටම අප සිත් පෙළඹෙන නිසාවෙනි. නමුදු පවතින පිළිවෙළම පැවතිය යුතු පිළිවෙළ නොවන බව වේගයෙන් වෙනස් වන නව ලොව තේරුම් ගෙන හමාරය. ඉඳින් නව නිමැවුම් පිපාසිත මිනිස් සිත, රළු බවෙහිද සුන්දරත්වය සොයා සතර දිග්බාගයේම ඇදී යන්නේ අපූර්ව නිපැයුම් ලොවට තිළිණ කරමිනි.

වෙනස යනු ලස්සනය...
‘වෙනස යනු ලස්සනය' යන්න බොහෝ අවස්ථා වලදී කියවී ඇති මෙන්ම සනාථ වී ඇති සංකල්පයකි. මඳක් විමසා බලන්නේ නම් සැබැවින්ම ‘වෙනස යනු ලස්සන' බව ඔබටද පිළිගන්නට හැකි වනු ඇත. අතීතය හා බලන කල අද වන විට වෙනස් වී නොමැති සංසිද්ධීන් නොමැති තරම්ය. ගොඩනැගිලි අමුද්‍රව්‍යයක් ලෙසින් පැමිණි රළු සිමෙන්ති මිශ්‍රණය හරහා මැවෙන සුන්දර නිර්මාණයන් එවන් සොඳුරු වෙනසකට තවත් කදිම නිදර්ශනයකි.

සිමෙන්ති අපට අලූත් යමක් නොවන්නේ මැටි වෙනුවට අප නිවෙස් හැඩ කරන්නට පැමිණි දා සිටය. කටු මැටියෙන් තැනුණු පැල්පත, නිවෙසක් වූයේ සිමෙන්ති වල පිහිටෙනි. ඒ අනුව ශක්තිමත් බවින් වැඩි, වතුර කාන්දු නොවනා, කල් පවතින බවින් යුත් ගොඩනැගිලි, සුදිලෙන ලස්සනකින් හා අපූරු තේජසකින් අලූත් වී අපට තිළිණ වුණි. අපගේ මුතුන් මිත්තන් සිහිනෙන් පමණක් දැක තිබූ විවිධ හැඩයෙන් යුත් වර්ණවත් නිවාස අපගේ නිවාස අවශ්‍යතාවය සපුරන්නේ ඉහත කී ප්‍රතිස්ථාපනය නිසාවෙනි. ඒ වෙනස සැබැවින්ම ලස්සනය. නමුදු වෙනස යනු කිසිදා නතර වී විඩා නිවනා සංසිද්ධියක් නොවන නිසාවෙන් අද වන විට සිමෙන්තියෙන් කරනා වැඩ කටයුතු හුදෙක් නිවාස තැනීමෙන් ඔබ්බට ගොස් වෙනස්ම වූ අපූර්ව නිමැවුම් මවයි.

සාමාන්‍යකරණයෙන් ඔබ්බට...
ගොඩනැගිලි අමුද්‍රව්‍යයක් ලෙසින් සිමෙන්ති අපට සැබැවින්ම සමීප නමුත් අද වන විට එය තවත් එක් පියවරක් ඉදිරියට ගොස් ඇත්තේ එහි වන ‘රළු බව ‘ලස්සන' යන සළුවෙන් කදිමට ආවරණය කරගෙනය. සංවේදී මිනිස් ඇස් සහ අත් රළු සිමෙන්ති මිශ්‍රණයෙන් සුන්දර නිර්මාණයන් මවන්නේ ආශ්චර්යමත් අන්දමිනි.

නිවෙසක් සෑමවිටම ගොඩනැගෙන්නේ නෙතට රසඳුනක් ලෙසින් වන්නටය. වෙහෙසකර දිනක් අවසානයේ කෙනෙකු සිය නිවෙස බලා ඉගිලෙන්නේ සැහැල්ලූව සැනසීම සොයාගෙනය. එම සුවදායී නවාතැන්පළ සරසන්නට ඔබ අප නොකරනා දෙයක් නැත්තේ එනිසාය. වත්මන් බොහෝ නිවාසයන්හි ගෙවුයන මෙන්ම නිවාස ඇතුළතද සරසන්නට දැන් භාවිත කරන්නේ සිමෙන්ති නිෂ්පාදනයන්ය. එදා ජෙප්රි භාවා සමඟින් ලංකාවට සපැමිණි මෙම වෙනස් සුන්දරත්වය මෑතකදී යළිත් කරළියට පැමිණියේ 2003 වර්ෂයේ පමණය. නිතරම වෙනස්, අලූත් දෙයක් කිරීමට සහජ ආශාවෙන් යුත් අප, මෙවන් නවමු වෙනස්වීම් වලට අප ජීවිත තුළ ලබා දෙන්නේ වැදගත් ස්ථානයකි. සෑදීමෙන් නොනැවතී සැරසීම තෙක්ම පැමිණි හිතවතෙකු වන සිමෙන්ති අප නිවෙස් විසින් ආදරයෙන් පිළිගනු ලැබුවේ එහෙයිනි.

මෙම සිමෙන්ති නිර්මාණයන් කුඩා සබන් රඳවනයේ පටන් නිදන කාමර කට්ටල දක්වා පැතිර ඇතැයි මා පවසන්නේ නම් ඔබ පුදුම වනවා නොවේද? එය සැබෑවකි. සියලූ දෙයින් උපරිම ප්‍රයෝජන ගන්නට වෙර දරනා මිනිස් දෑතින් මැවුණු මෙවන් නිර්මාණයන් රැසකි. ගෙවුයනෙහි වන ස්වාභාවික සුන්දරත්වය දෙගුණ තෙගුණ කරවනා දිය සැරසිලි, විවිධ හැඩයෙන් යුත් බඳුන්, ප්‍රතිමා, උයන් පුටු හා මේස ආදිය මෙන්ම නිවෙස් අභ්‍යන්තර අලංකරණය සඳහා වන ඉටිපන්දම් රඳවනයන්, ලාම්පු ආවරණයන්, ෙකා්පී ටේබල්ස්, ඇඳන් හා ඒ අසළින් තබනා ස්ටූලයන් මෙන්ම නාන කාමර උපාංග පවා දැන් සිමෙන්තියෙන් නිම වී ඇත. ස්වාභාව දහම හා සරිලන සරල ලස්සනට ඇළුම් කරනා මිනිසුන් මෙවැනි නිර්මාණයන් සඳහා සිය නිවෙස් තුළ ලබා දෙන්නේ ඉහළ වටිනාකමකි. මුලින් දැවයෙන් හා මැටියෙන් පමණක් සාදන ලද මෙවැනි ගෘහ අලංකරණ උපාංගයන් සිමෙන්තියෙන් නිපදවන්නට මූලිකම හේතුව වූයේ නව වෙනසට ඇළුම් කරනා නිර්මාණශීලී මිනිස් චින්තනයය. එයට අමතරව කල්පැවැත්ම, පාවිච්චියෙහි පහසුව, පුළුල් නිර්මාණ වපසරිය, ඉක්මන් හා පහසු නිපදවීමේ ක්‍රමෝපායන් ආදි‍යද මෙවැනි නිර්මාණයන්ගේ ශීඝ්‍ර පැතිරීමට තුඩු දුන් කාරණාවන්ය. පරම්පරා ගණනක් තිස්සේ අපට සෙවණ දෙන නිවාසයන් තනනා සිමෙන්තියෙන් කෙරූ ගෘහ අලංකරණයන් පිළිබඳව අපට වැඩි විශ්වාසයක්ද තැබිය හැකිය. ස්වාභාවික සුන්දරත්වයට වැඩි ළෙංගතු කමක් දක්වන්නන් මෙවන් සිමෙන්ති නිර්මාණයන්ට බෙහෙවින් ඇළුම් කරන්නේ ඒවා ස්වාභාව ධර්මයෙහි වන සරල, රළු ලස්සන හා අපූරුවට මුසු වන නිසාවෙනි.

ආශ්චර්යාත්මක ගැළපුම
"සීතල පින්න රැඳි පලා පැහැ ගත් තණ කොළ යාය මත අපූරුවට තැන්පත් වූ හරි හතරැස් ගල් තලාවට උඩින් සීරුවට වතුර වෑස්සෙන පිරිසිදු කලු ගලින් සැදි හුරුබුහුටි කළයකි"
මෙවන් සජීවී ලස්සනක් දෑස් ඉදිරිපිට මවන්නට සිමෙන්ති නිර්මාණයන් අද වන විට සමත් වී ඇත. විශාල ගෙවුයනකට ඇළුම් කරනා පරිසර හිතකාමීන් සිය ගෙවුයන සැරසීම සඳහා මෙවන් දිය සැරසිලි බහුලව යොදා ගනී. සිමෙන්තියෙන් සෑදූ මෙවන් දිය සැරසිලි හා සිමෙන්ති කුලූනු තුළට වර්ණවත් විදුළි බුබුළු සවි කර රා‍ත්‍රී කළුවරට දේදුණු පැහැ ගත් සුන්දරත්වයක් එක් කර ගැනීමටද රැයෙහි නිසංසලත්වය විඳීමේ ළැදි ඔබට හැකියාව ඇත. සිමෙන්ති කුලූනු අතරින් හා දිය සීරාව මැද්දෙන් වර්ණවත් ආලෝකය පෙරී එන විට ගෙනෙන ලස්සන ඔබට මිහිපිට සුර ලොවක් මවනවාට සැක නැත. එසේම අද උද්‍යානාලංකරණය තුළ වැඩි වශයෙන් භාවිත වන දැවැන්ත සිමෙන්ති බඳුන්ද ඔබගේ ගෙවුයනට තේජාන්විත සුන්දරත්වයක් එක් කරනු ඇත.

විවිධ ප්‍රමාණයෙන් යුත් සිමෙන්ති ප්‍රතිමා ආදියද නිවසෙහි අලංකරණය සඳහා යොදා ගැන්ම දැන් එක්තරා විලාසිතාවක් බවට පත් වී ඇත. රළු සිමෙන්ති මිශ්‍රණයෙන් සුමුදුව නිමවෙන මෙවන් ‍ප්‍රතිමා ප්‍රධාන වශයෙන් වර්ග හතරකි. එනම්, බුද්ධ ප්‍රතිමාව, අලකේෂ්වර ප්‍රතිමාව, ගණ දෙවි ප්‍රතිමාව හා නන්දි‍ යන ප්‍රතිමාන්ය. මෙවන් නිර්මාණයන් සිය විශ්වාසයන් හා ඇදහිලි වලට අනුව දර්ශනය කිරීමෙන් සිය ඇතුළාන්තය විදහාපාන්නට නිවෙසියන්ට අවස්ථාව ලැබේ. නිවසෙහි පිටත තබනා මෙවන් ප්‍රතිමාවන් බොහෝ විට ප්‍රමාණයෙන් විශාලය. නවතම ප්‍රවණතාවය වන්නේ මෙවන් ප්‍රතිමාවන්හි වර්ණ ආලේපනය කිරීමය. සිමෙන්ති මත වර්ණ ගැන්වීම කල්පැවැත්ම අතින්ද ඉහළ බව අමුතුවෙන් සඳහන් කළ යුත්තක් නොවේය. ඔබගේ අවශ්‍යතාවය මත හා වර්ණ ගැළපීම මත වෙනස් වූ විවිධ වර්ණ කරා යෑමේ අසීමිත නිදහසක්ද මෙම නිර්මාණ ලොව තුළ පවතී.

විවිධ හැඩයෙන් යුත් සිමෙන්ති බඳුන් තුළ විසිතුරු ඇට වර්ගයන් හා තිරිවානා හෝ කුඩා කළු ගල් කැබලි දමා සරල සුන්දර ගෘහ සැරසිල්ලක් විසිත්ත කාමරයට කැන්දවිය හැකි අතර එවන්ම බඳුනකට දිය පුරවා ඒ මත මල් ඇතිරීම මගින් නිවෙසට සුබ නිමිත්තක් ලෙසින්ද භාවිත කළ හැකිය. එවන් දෙයකට කාලය මෙන්ම මුදල්ද වැය වන්නේ සුළු වශයෙන් වුවත් එමගින් ඔබගේ විසිත්ත කාමරයට එක් කරනා අපූර්වත්වය නම් සුළුපටු නොවේය. තවත් මෙවන් සරල සුන්දර සැරසිල්ලක් ලෙසින් ඉටිපන්දම් රඳවනයන් දැක්විය හැකිය. විවිධ වර්ණයෙන් හා හැඩයෙන් යුත් හුරුබුහුටි ඉටිපන්දම් මෙම සිමෙන්ති ඉටිපන්දම් රඳවන්යන් මත රැඳවීම මගින් සුමට ආලෝකය, වර්ණවත් වර්ණ හා රළු සිමෙන්තිය සුසංයෝගයෙන් මැවෙනා කදි‍ථම අලංකරණයක් ඔබගේ විසිත්ත කාමරයට, නිදන කාමරයට පමණක් නොව නාන කාමරයට පවා ලබා ගත හැකිය. මෙතෙකින් නොනැවතී සිමෙන්ති නිෂ්පාදනයන් ලාම්පු ආවරණයන් දක්වාද පුළුල් වී ඇත. විසිත්ත කාමරයට තේජාන්විත පෙනුමක් එක් කරන්නට සිමෙන්ති කුලූනු මත තබනා මෙවන් ලාම්පු ආවරණයන් වලට හැකියාව ඇත. නිදන කාමරයෙහි නිදන ඇඳ දෙපසින් තබනා ස්ටූලයන් (බෙඞ් සයිඞ් ටේබල්) ලෙසින්ද මෙම සිමෙන්ති කුලූනු යොදා ගත හැකිය. කළු ගල් ආභාශය සහිත මෙම සිමෙන්ති කුලූනු තද වර්ණිත බිත්තියක් හා ගැළපෙන්නට තබා ඒ මතින් සිමෙන්ති ලාම්පු ආවරණයක් රඳවා විදුලි බල්බය දල්වා බලන්න. ඔබ පුදුම වෙනු ඇත.

එපමණක් නොව මෙපමණ කාලයක් දැවයෙන්, ප්ලාස්ටික් හා වානේ ආදියෙන් කරනු ලැබූ ඇඳන්, මේස පමණක් නොව නාන කාමර කට්ටල පවා දැන් සිමෙන්තියෙන් නිර්මිතය. මෙම සිමෙන්ති ඇඳන් වියදම අතින් ඉතා සහනදායී වන අතර එමගින් සුවිෙශ්ෂී පෙනුමක්ද ඔබගේ නිදන කාමරයට ලබා ගත හැකිය. විශාල සිමෙන්ති කුලූනු මත ලෑලි අතුරා ඒ උඩින් සුවපහසු මෙට්ටයක් දැමීම මගින් ඔබට සුවපහසු යහනක් අඩු වියදමකින් හිමි කර ගත හැකිවේ. අපගේ ගෘහ අවශ්‍යතාවයන් සපුරන මේස පුටු ආදියද දැන් දැන් සිමෙන්තියෙන් නිර්මාණය වේ. මේ වෙනස කෙතරම් දුරකට පැතිර ඇත්දැයි කියනවා නම් අද වන විට නාන කාමර උපාංගයන් වන ඇඳුම් එල්ලනයන්, බුරුසු හා ආලේපන රඳවනයන්ද සිමෙන්තියෙන් නිර්මාණය වී ඇත. මෙහි ඇත්තේ සරල බව විදහා දැක්වෙන වෙනස්ම ලස්සනක් නිසාවෙන් මෙවන් නිර්මාණයන් වැඩි වශයෙන් හෝටල් ක්ෂේත්‍රය තුළ භාවිත වේ.

සෑම විටම අලූත් දෙයෙහි සුන්දරත්වය දකිනා මිනිස් ඇස් මෙම සුන්දර වෙනසට ලබා දී ඇති අපූර්වත්වය ඔබත් ඔබේ නිවෙසට එක් කර ගෙන බලන්න. අලූත් අලූත් දෑ අත්දැකීම ඔබව නැවත නැවතත් උපද්දවනවාට සැකයක් නැත.